Pagpahimutang nan CCTV cameras sa Surigao City tagsugyot nan PNP Prov’l Director
Tagsugyot kuman nan PNP Prov’l Director Senior Supt. Antony Maghari an pagpahimutang nan mga CCTV cameras sa Surigao City, ini human na mitumaw an sunod-sunod na insidente sa lungkab.
Tagtudlo niini, sa mga panghitabo na lungkab sa Cokaliong Shipping Lines Office ug Globe Telecom, an mga CCTV units suyod sa amo na mga establisemento an tagguba sa mga suspek ugsa na waya ma-recover sa mga otoridad an ebidensiya.
Sa inisyatibo nan PNP, mipahigayon sila nan survey sa pipila ka lugar na posible na didto ipahimutang an CCTV cameras sa 36 ka lain-laing lugar. An amo na sugyot an tagtakda na ipresentar nila kan Gov. Sol Matugas lakip an paghanjag ngadto sa iban na mga tag-ija sa establisemento na maka-afford labi na adton duol sa lugar na butangan sa CCTV cameras.
Dugang pa ni Senior Supt. Maghari, kon mapahimutang an mga CCTV cameras, ila tagplanuhan na an mamahimong monitoring room an ipahimutang sa City PNP building. Sumaya pa, may tagduol na sila na mga IT ug technical experts na naunang nohimo nan survey ug amoy magrekomendar kon pila kabuok na CCTV cameras an ipahimutang ug kon uno na klase.
Kon kahidumduman, adton milabay na katuigan una na nagplano an gobyerno sa Surigao City na mopahimutang nan CCTV cameras ugani naggahin nan kapin P20 milyones na pondo pero mitumaw an failure of bidding. Kuman 2018, nanhingusog si Mayor Ernesto Matugas na madajon an pagpahimutang nan CCTV cameras ugani may supplier na noduol ug an offer an bag-ong teknolohiya sa fiber optics. Pinaagi sa CCTV cameras, naglaum na dako an mahitabang niini sa pagsulbad sa lain-laing krimen.
