I-regulate sa kagamhanan ning syudad sa Cagayan de Oro ang paggamit og ‘drones’ atol sa tulo ka mga dagkong kalihukan sa pista.
Kini human gimando ni Cagayan de Oro City Mayor Oscar Moreno ang pagpatuman og ‘regulation of flying aerial drones’.
Pinasikad sa Executive Order No. 143-2018, matawag nga “regulated no fly zones’ sa mga drones ang mga rota nga ma-agian sa Carnival Street Parade, Agosto 26 gikan alas-3:00 sa hapon hangtud ala-7:00 sa gabii; Floats and Civic Military Parade, Agosto 27 gikan ala-7:00 sa buntag hangtud alas-12:00 sa udto; ug Religious Procession, Agosto 28 gikan alas-4:00 sa sayong buntag hangtud alas-8:00 sa buntag.
Ang Carnival Street Parade magsugod sa kanto sa dalan J. Luna-Velez, dayon tadlas sa Velez padulong sa end point diha sa may Rodelsa Circle, barangay Nazareth.
Samtang ang Floats and Civic Military Parade sugdan sa Rodelsa Circle; diretso sa dalan Velez; liko patuo sa may C.M. Recto Avenue ug matapos sa Limketkai Center.
Sugdan usab ang Religious Procession sa dalan Fernandez duol sa St. Augustine Cathedral; dayon lahos sa Corrales Avenue, dalan Neri, Capistrano ug balik sa Cathedral.
Hinoon, mahimong makapangayo og clearance gikan sa Cagayan de Oro City Police Office headquarters aron adunay panugot nga makapalupad og drone atol sa maong mga kalihukan.
Gikinahanglan lang ang personal appearance sa drone operator ug lakip mismo ang unit sa drone; photocopy sa valid ID; ug pagpirma og waiver.
