Kalibo, Aklan – Tama it pagbuno rong naangkon it daywa ka mga eaeaki matapos nga mabun-an kabii sa corner it Roxas Avenue ag L. Barrios St., Kalibo, Aklan.
Sa inisyal nga report it Kalibo PNP naga guwa nga sa andang pag responde nakilaea ro mga persona nga involve sa insidente nga sanday Dave Maming Dadivas, 19-anyos, Edwin Villagracias Reye, 23-anyos it Andagao, Kalibo ag Ken Jester Nadado Nahil, 18-anyos it Bakhaw Norte, Kalibo.
Naga guwa sa imbestigasyon nga gina alegar ni Reyes nga imaw hay naga inum sa sangka baraka nga nahamtang sa lugar maeapit sa Andoks kung sa siin nag-abot si Dadivas ag nangayo it inum ag ko ulihi hay pumanaw pagbalik na hay may kaibahan eon imaw nga si Nahil ag sa uwa it kung anong rason imaw ra hay binuno ni Dadivas gamit rong kutsilyo nga umigo sa anang tiyan.
Uwa pa gid nakuntento si Dadivas hay ginhana pa gid nga bun-on sa li-og si Reyes pero anang nasagang ag tumama sa anang sa siko.
Dugang pa gid ni Reyes nga maskin may tama eon imaw hay ana pa nga gin eagas si Dadivas ugaling natigayon nga makapaeagiw ag nahaabangan imaw ni Nahil pero binuno naman raya nga inigo sa likod.
Tanan ra sanda ginpangdaea sa hospital para mataw-an it nagakaigo nga pagbueong ag naka hospital arrest samtang si Dadivas hay kulong sa lock up cell it Kalibo PNP.
Sa makaron nagapadayon pa rong imbestigasyon it Kalibo PNP angot sa nasambit nga insidente.
