General santos City—Gipaabot pa kon unsa ang mamahimong sunod nga lakang kalabot sa natigayong pagpamusil sa usa ka bag-ong bar sa Cannery Road Citizens Village, Poblacion, Polomolok, South Cotabato, nga gikalambigitan sa mga sundalo, kung asa usa ka patay ug duha ang angol.
Kahinumduman nga ang namatay mao si Aries John Ang, 23-anyos, samtang ang mga nasamdan mao silang John Angelo Felisilda, 18-anyos, usa ka senior high student; ug Freddie Simacas, 27, pulos mga residente sa Citizens Village, Poblacion, Polomolok. Matud ni P/S/Supt. Franklin Alvero, PNP provincial director, gipaabot pa kon magpasang-at ug kaso ang pamilya sa mga biktima.
Sumala pa nga base sa imbestigasyon, nasumbagan sa grupo sa mga biktima ang usa ka kauban sa mga sundalo nga naka-inom na, hinungdan nga miresponde sila nga misangko sa pagpamusil.
Kahinumduman nga natingala ang witness gumikan dili ang nakapusil ang maoy gibalhug sa selda inay ang kauban lang nga si PFC Reynold Londres, 28-anyos, miyembro sa 27th Infantry Batallion (IB) sa Tupi, South Cotabato.
Samtang ang mga kaubanan niini nga silang Staff Sergeant Trance, Staff Sergeant Rebullos ug PFC Sabillo ang gikabutyag nga wala gidakop sa kapulisan. (Emir Bariquit)
