Tampakan, South Cotabato–Gibutyag ni Police Captain Joseph Villanueva labaw sa Tampakan MPS nga usa sa gilantaw nilang pinakaduol nga motibo sa kamatayon sa mag-uumang si Ronald Hambala ang dunay kalambigitan sa illegal nga droga.
Pag-angkon ni Villanueva nga usa ang biktima sa ilang target sa kampanya batok sa illegal nga droga apan misurender kini tungod kay gustong mag bag-o sa iyang kinabuhi.
Sa karon wala pay kasayuran ang pamilya sa hinungdan sa kamatayon sa ilang anak gumikan kay wala man kini nakalaban sa ilang lugar.
Dugang asoy ni Villanueva nga sa pagkakaron wala pa silay matumbok nga suspek sa mihimo sa krimen bisan pa man duna nay mga witness nga nakakita sa mipusil sa biktima.
Kini gumikan kay dili pa makahatag ug impormasyon ang mga witness ngadto kanila sa rason nga anaa pa kini sa trauma.
Kahibaloan nga magbis-bis lang unta sa iyang tinanom ang biktima dihang gisulod sa suspek ang panimalay niini ug diretso gipusil sa makadaghang higayon sa ulo ug lawas nga hinungdan sa iyang kamatayon.(Reynald Timario)
