General Santos City– Giangkon ni Noria Mudia, usa sa mga claimant sa luna nga nahimutang sa Mudia Extension, Barangay Labangal, Gensan nga gumikan gyud sa away sa luna ang hinungdan sa pagpamusil ngadto sa iyang iyaan nga si Lucia Aloja, nga residente gihapon sa maong lugar.
Matud niini nga nagkural sila sa luna dihang miabot ang suspetsado nga si Danny Mudia ug ang igsuon niini nga si Bengie Mudia. Dinhi na matud pa nahitabo ang init nga diskusyon tali sa grupo ni Noria ug ni Danny Mudia. Gumikan niini nahitabo ang panaglalis nga misangko sa pagpamusil sa suspek nga si Danny ngadto sa biktimang si Lucia Aleja.
Dugang pa ni Noria Mudia nga siya gyud unta ang target sa managsuon apan siya nakadagan ug ang iyang iyaan maoy napusilan. Samtang todo depensa usab si Danny Mudia sa akusasyon ni Noria Mudia. Sumala niini nga igo lang nilang gidepensahan ang ilang mga kaugalingon human nga sila maoy unang gi-ataki sa mga nahisgutan.
Pag-abot matud pa nila sa lugar, gitigbas matud pa ang iyang igsuon nga si Bengie apan siya maoy naigo. Gipaklaro usab niini nga ilaha ang area nga gikural sa grupo ni Noria ug dili tinuod matud pa nga ang grupo sa reklamante maoy nanag-iya sa maong luna. Sa karon ang Police Station 2 naghimo na ug imbestigasyon sa maong insidente ug ila nalang ginahuwat ang kabanay sa biktimang si Alejo alang sa pagpasang-at ug kaso.
