Masulbar na ang halos isa ka semana nga tilig-angon sang isa ka amay sa Purok Seresa South, Brgy. 3, ciudad sang Bacolod matapos nakabaton sang food pack gikan sa Bayanihan sa Number 1 nga proyekto sang DYHB.
Subong nga adlaw, ang kick-off sang pagpanagtag sang food packs sang DYHB gikan sa donasyon sang maalwan nga mga pumuluyo, kompaniya, government officials kag suki nga tagpalamati sang istasyon agud mabuligan ang mga kubos nga wala nakabaton sang Social Amelioration Program (SAP) kag indi man benepisyaryo sang Pantawid Pamilyang Pilipino Program (4Ps) sa ciudad sang Bacolod.
Ang 55-anyos nga si Vicente Tambuong, ang isa lamang sa kapin isa ka gatos nga recepient sang una nga wave sang tagtaganay sa Purok Tilapia, Kamunsil, kag Ceresa sa Brgy. 3. kag tuman ang pagpasalamat sini bangud nga masulbar na ang isa nila ka semana nga tilig-angon.
Si Tambuong, ang nagapang-repair sang guba nga electric fan kag radyo sa iya balay kag sang wala pa napatuman ang Enhanced Community Quarantine (ECQ), P300 ang nubo na nga kita sini sa isa ka adlaw.
Apang sa karun nga epektibo ang ECQ, halos wala na siya sang income bangud nga wala man sang nagaguwa sa ila mga balay kag nagapakay-o sang guba nila nga mga appliances.Gani tuman ang pagpasalamat sini sa food pack nga may unod nga 5 kilos sang bugas, isa ka putos sang uga, tinapay, delata kag isa ka bottle sang CL Pito-Pito.
[image: image.png]
