Gibalik na sa Panggagamhanang Probinsyal sa Bukidnon ang pagpahatag ug pinansyal nga ayuda matag adlaw nga Miyerkules sa kapitolyo probinsyal.
Sa interview sa RMN Malaybalay ngadto kang Hansel Echavez, supervising administrative officer sa PGB Public Affairs Information and Assistance (PAIA) office gibutyag niini nga sa karon basihan ang daan nga listahan sa nakalabay nga tuig nga gikan sa Provincial Social Welfare and Development Office kon PSWDO.
Gibutyag niini kadtong wala sa listahan, dili gayud makadawat sa maong ayuda, maong kung tan-aw niini nga usa sa pinaka-kabus nga pamilya sa probinsya sa Bukidnon, gikinahanglang mobisita sa city/municipal social welfare and development office sa ilang lungsod aron magpalista ug ma-apil sa profiling nga nagpadayon sa kabaranggayan nga hangtod lamang sa katapusang adlaw sa Agosot ning tuiga.
Matud ni Echavez nga sugod sa Setyembre 4 ning tuiga, ang bag-ong listahan nga gisumite gikan sa CSWD o MSWDO mao nay basehan sa probinsya, ugaling wala gihapon ma-apil sa gisumite nga listahan dili gihapon makadawat sa ayuda gikan sa probinsya.
Gidugang pa niini nga ang kantidad nga madawat, alang sa lumulupyo sa Malaybalay usa ka libo ka pesos ug duha ka libo ka pesos alang sa lumulupyo gawas sa Malaybalay ug makadawat niini matag tulo ka bulan.
