Sultan Kudarat—Kumpirmado ang pagpangrekrut sa Islamic State of Iraq and Syria (Isis) ug ang ilang training camp nga nahimutang sa Sultan Kudarat og Maguindanao.
Kini ang pamahayag ni Sultan Kudarat Police Provincial Office director, Senior Superintendent Raul Supiter sa pakighinabi sa RMN Gensan. Kahibaluan nga nagpagawas dayon og kamandoan si Police Senior Superintendent Supiter nga palig-unon pa ang seguridad sa tanang dapit sa probinsiya tungog sa maong report.
Nasayran nga ang pagpangrekrut sa mga terorista dunay bugti nga dakong kantidad nga suweldo ug armas.
Samtang bansayon sa local ISIS ang ilang narekrut sa training camp niini sa mga hilit nga dapit sa Sultan Kudarat ug Maguindanao Province. Wala hinuon gikompirma ni Supiter kung asa nga dapit ang partikular nga training camp sa mga terorista gumikan padayon pa nila kining gipanid-an.
Nasayran nga kasagaran sa mga gipang-rekrut mga kabatan-onan ug duna say mga menor de edad. Nanawagan si Supiter sa katawhan sa probinsiya sa Sultan Kudarat nga igmaton ang ilang kaugalingon ug itaho dayon sa mga awtoridad ang kalihukan sa mga dautang pundok ilabi na ang mga terorista. (Emir Bariquit)
