General Santos City–Wala pa gihapoy suspetsadong napasakaan og kaso ang Polomolok Police Station bahin sa pagpusil patay sa kanhing kapitan sa Brgy Lapu, Polomolok South Cotabato.
Sumala ni Police Chief Inspector Alex Joe Orcajada- hepe sa Polomolok PNP, ila pang ginapaabot ang pamilya sa biktimang si Olama Nilong aron ilang asikasohon ang pagpasang-at ug kaso ngadto sa piskalya.
Gumikan niini wala pay nadakpang responsible sa krimen luyo pa man nga duna nay motibong ginatutukan ug duna nay mga tawong gitumbok nga mga suspek.
Matud ni Orcajada nga kinahanglan pa man gud nga dunay mugawas nga warrant of arrest gikan sa korte ayha dakpon ang mga suspetsado.
Dugang gibutyag ni PCI Orcajada nga midangop sa ilang abogado ang pamilya sa biktimang si Nilong kung asa posibleng maoy muhimo sa ilang sworn statement.
Dili hinuon masiguro ni Orcajada kung pila ka mga tawo ang mapasakaan ug kaso sa pamilya apan sa kabahin sa kapulisan dunay tulo ka tawo ang matumbok nga suspek.
Apan mahimo matud pang madungagan ang mga tawong malambigit sa kaso kung asa mag depende kini sa resulta sa himuon pang dugang imbestigasyon. (Jordan Britos)
