Gikasubo ni Misamis Oriental Governor Bambi Emano ang kamatayon ni Kapitan Claver Miral sa Balingasag, Misamis Oriental.
Tungod niini, nanawagan karon ang gobernador og daling resolusyon sa pagpusil patay kang Kapitan Miral sa Barangay Napaliran.
Nasayran nga nagpagawas na kini og direktiba ngadto kang Police Office Chief Rolando Destura alang sa paspas nga imbestigasyon sa kaso.
Samtang buot karon ni Misamis Oriental Governor Bambi Emano nga tutukan sa kapolisan ang maong kaso.
Sa impormasyon nga iyang nadawat, gikan sa birthday party si Kapitan Claver Miral sa silingang lungsod dihang gipusil kini sa duha ka suspek nga nakamotorsiklo atol sa pagpauli.
Igo sa dughan ug paa ang naangkon ni Kapitan Miral nga maoy hinungdan sa iyang kamatayon.
Sa karon dili pa masuta kung adunay kalambigitan sa pulitika ang kamatayon sa maong kapitan.
