General Santos City—Posibling awayan sa Negosyo ang usa sa mga motibong pagpusil-patay sa Retiradong sundalo nga si Army Col. Jack Espira, 67 anyos nga taga Cagayan De Oro City ug temporaryong nagpuyo sa Purok PVU Yumang Street Barangay City Heights General Santos.
Sumala kang P/Lt. Ben Venus, Deputy Station Commander sa Police Station 4 nga subay sa inisyal nga imbestigasyon, lambigit matud pa sa negosyo sa taklobo ang nahisgutan kanhing opisyal sa Militar. Sa karon padayon pa usab ang ilahang ginahimo nga imbetigasyon sa posibleng ilhanan sa upat ka mga suspek nga maoy nipatay sa biktima.
Dugang pamahayag ni Lt. Venus nga subay sa pamahayag sa mga testigo, sakay sa duha ka motorsiklo ang upat ka mga suspek nga kalit nga mi-hunong sa likod nga bahin sa biktima ug dayon pusil.
Nakaangkon ug unom ka mga igo pinusilan sa ulo ang biktima, tulo sa ilalom sa iyahang dunggan samtang tulo sa nawong. Narekober sa crime scene ang lima ka empty shell sa kalibre 45 nga armas ug usa ka deformed nga empty shell.
Sa karon, ilaha pang ginasuta kung adunay mga cctv sa lugar kung asa nahitabo ang krimen sa panghinaut nga makatabang sa pagresolba sa maong kaso.(LVR)
