Maitum, Sarangani Province–Hugot nga gikondena sa mga opisyal sa lokal nga panggamhanan sa munisipyo sa Maitum, Probinsiya sa Sarangani sa pagpanguna ni Mayor Bryan Reganit ang pagpusil patay Kang Barangay Mindupok Kapitan Muhammad Akmad, nga una ng gipusil sa mga armadong grupo niadtong milabay nga adlaw kung asa apil usab nga nasamdan ang duha ka mga kauban niini.
Sumala pa ni Mayor Reganit nga anaa pa sa talandugon nga kahimtang ang usa ka biktima sulod sa ospital samtang ang usa ang nakagawas na ug anaa na sa ilang panimalay. Dugang sa Mayor nga dakong kawad-on sa munisipyo sa Maitum ang kamatayon sa maong Kapitan gumikan kay usa kini ka aktibo nga opisyales sa Brgy. nga nagalantaw kanunay sa kaayuhan sa katawhan.
Nagtuo usab ang opisyal nga usa sa motibo sa pagpusil patay sa Kapitan mao ang pagbabag niini sa pagatukoron nga bag-ong kampo sa usa ka grupo sa maong Barangay. Kahibaluan nga niadtong panahona nag-adto lang sa baybay ang napatay’ng Kapitan ug pauli na unta kini sa dihang nahitabo ang pagpamusil. (RV)
