Bacolod City – Ang pagrevoke ni President Rodrigo Duterte sang Executive Order (EO) ni former President Benigno Aquino III, ang EO 183 nga nagatukod sang Negros Island Region (NIR), Region XVIII ang ginkasubo sang mga Negrosanon.
Sang sini lang, paagi sa E.O No. 38 ni Duterte ginapabalik niya ang Negros Occidental sa Western Visayas (Region VI) kag ang Negros Oriental sa Central Visayas (Region VII).
Bilang reaksyon, suno kay Governor Alfredo Maranon, Jr. sang Negros Occidental masubo ini sa bahin sang probinsya bangod madugay na nga handum sang mga Negrosanon nga natunga sa duha ka rehiyon, apisar nga isa lang ini ka isla, nga matingob sa isa lang kon tani ka rehiyon.
Suno naman kay Vice-Governor Eugenio Jose Lacson, indi priority sang Duterte administration ang NIR humalin nga ini ang nagpungko bilang Presidente. Panugyan ni Lacson, nga magtukod nalang sang isa ka special body para mapadayon ang kooperasyon sang duha ka probinsya.
Nagpabutyag man sang kasubo si Bacolod Lone District Congressman Greg Gasataya apang positibo siya nga mapadayon sa gihapon ang kauswagan sang duha ka probinsya sa suporta sang Presidente sa mga departamento.
