Malipayon nga gisaulog kagahapong adlawa, adlaw nga Hwebes, ang founding anniversary sa Provincial Jail sa probinsya sa Sarangani. Personal kining gibisita ni Governor Steve Chiongbian Solon.
Ensakto baynte-dos (22) katuig human gipatindog ang Sarangani Provincial Jail, gipatukod tulo (3) katuig human nga ni-separar ang Sarangani sa South Cotabato tuig 1992.
Dako ang pagpasalamat ni Jail Warden Manuel “Busoy” Sales tungod kay hapsay og daghan ng pagbag-o og kalambuan ang nahitabo sulod sa provincial jail. Tungod na usab matud pa sa bug-os nga pagsuporta sa mga local official sa pagpanguna ni Governor Solon kauban sila Vice Governor Elmer De Peralta, mga board member og mga mayores, og sa ayuda nila Senador Manny og Congressman Ruel Pacquiao.
Apan mas labing nalipay og nagpasalamat ang dul-an saysentos (<600) kabuok mga inmates tungod kay sila matud pa ang naka-benipisyo sa maayong pagdumala, hugot nga gipatuman ang mga palisiya apan anaa matud pa ang pagpangga ngadto kanila. Gibutyag sa usa ka binilanggo nga si Alyas Boy, nga sa pagkaon pa lang, bastante sila, wala pa man gani daw nakaon ang pamahaw, gidulot na ngadto kanila ang paniudto. Makakaog presko nga isda og gulay, anaa pay pakapin nga manok og karne. Sa lima (5) katuig nga pagtinir ni Alyas Boy, sa sulod sa provincial jail niya nahuman ang iyang high school pinaagi sa ALS kon Alternative Learning System. Nahimo pa siyang NC II passer sa massage therapy og karon ginahuman niini ang electrical maintenance. Gibutyag ni Sales nga gipadagan ang provincial jail dili aron silutan na lang ang nakabuhat og kasal-anan kundili nga lugar usab kini aron mabag-o ang kinabuhi. Anaa ang nagkadaiyang religious group aron muhatag og values og moral formation. Anaa pud ang PSWDO og TESDA makanunayon nga gahatag og mga skills training. Mapasigarbuhon si Warden Sales sa pagpabalo nga tungod sa ilang pagtikad sa lima (5) ka ektaryang luna ilang gitamnan og nagkadaiyang gulay og lagutmon, abunda na karon sa suplay sa presko og organic nga utanon ang Sarangani Provincial Jail. Sa pagbisita ni Governor Solon kagahapon, gawas nga sponsor kini para sa papremyo sa mga padula og sa salu-salo sa mga jail guard og inmates, bitbit usab niini ang 49-inches flat screen television sarang magamit sa sulod.
