Davao City- Walay na-engkwentro nga dagko nga problema ang City Transport and Traffic Management Office (CTTMO) kabahin sa pagsugod og isyu og citation tickets ngadto sa mga malapason sa balaod trapiko dinhi sa siyudad nga gisugdan kaniadtong lunes, Setyembre 11.
Sa interbyu sa DXDC RMN Davao kang (CTTMO) head Dionisio Abude, dili niya maingon nga dako nga problema ang na-engkwentro sa pipila ka mga traffic enforcers sama sa mga gagmayng reklamo sa mga jaywalkers ug mga motorista.
“Ang uban mu-complain kay nganong ang uban tao wala maisyuhi og ticket kay sa kadaghan sa tao, dili maokupar tanan sa usa ka enforcer sa usa ka area, murag valid iyang complain, kay wala tanan mahatagi og citation kay dili makaya kay pipila lang sila (traffic enforcers) unya naay uban nga nagreklamo nga nganong ang iyang motor gidakop, ang usa wala, pag verify namo sa area, private ang parking area. Okay man, wala may problema, walay na-ecounter nga mga problema kabahin sa pag-isyu sa citation tickets,’’ sulti ni Abude.
Sa unang adlaw nga gi-implementar ang maong balaod sa siyudad, natala sa CTTMO ang 526 ka mga malapason sa balaod trapiko diin katunga niini ang nadakpan tungod wala migamit og pedestrian lane samtang ang uban mao ang mga drayber nga misupak sa palisiya sa loading ug unloading.
Sa karon, duna nay ubang mga nadakpan ang mibayad na sa ilang multa sa City Treasurer’s Office (CTO) subay sa citation ticket nga gi-isyu ngadto kanila.
Kasamang Renz Barbarona
