BACOLOD CITY – Kanya-kanya nga gimik ang ginpatigayon sang duha ka magka-sumpong nga partido politikal sa ciudad sang Bacolod sa pagsugod na kahapon sang local campaign period, Marso 29.
Ang Grupo Progreso, ginpangunahan ni incumbent Mayor kag re-electionist Evelio Bing Leonardia upod ang iya mga miembro kag supporters.
Ila ginsuguran ang kampanya pinaagi sa pagpatigayon sang motorcade nga naglibot sa pila ka bahin sang ciudad kag ginsundan sang misa sa Oratory of St. Nicholas of Tolentino sa UNO-R kag nagtapos sa Pope John Paul Tower sa Reclamation Area para sa ila rally.
Samtang ang Asenso for Better Bacolod naman ukon ABB-MKK ang ginpangunahan ni anay Bacolod Mayor kag karon congressional candidate Monico Puentevella.
Ginsuguran sang kampo ni Monico ang ila kampanya pinaagi sa pagpatigayon sang hand shaking sa mga pumuluyo sang Brgy. Banago.
