BACOLOD CITY – Ginsulod sang isa ka Taiwanese national kag 11 sini ka mga tinawo ang isa ka bar sa Goldenfield Commercial Complex diri sa ciudad sang Bacolod pasado las 8 sini nga aga.
Ang amo nga Taiwanese national ang 30 percent owner sang Bunny Ranch apang wala siya ginapahanugutan nga makasulod ukon banned ini nga magsulod sa bar bangud sang pending nga kaso nga ginfile sa iya sang iya Pinoy business partner i nga si Joseph Nazareno.
Ang kaso nag-ugat sang ginbuko nga tiruhon kag patyon si Nazareno sadtong nagliligad nga bulan kag isa sa iya gintudlo nga suspek amo ang iya business partner nga Taiwanese national.
Pasado las 8 sini nga aga, ginsulong sang Taiwanese ang Bunny Ranch upod ang 11 ka mga tinawo kag ginreport gintayaan kag gindis-armahan ang mga security guards on duty.
Bangud sini, nagpensar ang mga tawo sa palibot nga may nagakatabo nga hostage taking rason nga nagtawag sang police kag madasig man nga nag-abot ang SWAT team sang Bacolod City Police Office.
Matapos nagresponde, gindala sang police ang 11 ka mga kalalakin-an lakip na ang Taiwanese kon diin ini sila ang igapaidalum sa imbestigasyon.
Wala sang armas nga narekover ang mga otoridad sa mga nagsulod nga tawo, baliskad sa una nga ginreport nga may pagpangpataya nga natabo sa gwardya.
Ginhold man sang kapulisan ang anum ka mga gwardya sang JRY Security Agency nga kon tani magatake-over sa tion nga maplastar na sang Taiwanese national ang iya mga tinawo sa sulod apang wala ini natigayon.
Sa initial nga report, kaso nga grave coercion ang ipasaka ni Nazareno sa Taiwanese national kag 11 sini ka mga tinawo.
