MOISES PADILLA – Huring Huring ukon indi matuod suno kay PSInp. Allan Relloj, ang Chief of Police sang Moises Padilla ang report nga may pamahug halin sa New People’s Army (NPA) nga salakayun ang munisipyo sang Moises Padilla.
Sang nagligad nga Biyernes, nakabaton sang tawag ang Mayor’s Office sa diin sekretarya ang nakasabat nga may mga armado nga tawo nga luyag salakayon ang banwa bangod man sa natabo nga pag-aresto kay Vice-Mayor Ella Garcia – Yulo sa checkpoint nga ginpatigayon sang Moises Padilla PNP.
Si Yulo ang nakuhaan sang armas, bala, granada kag ginasiling shabu, nga nagnegatibo man sa Crime Laboratory.
Amu ini ang rasun kon ngaa nga ginpapauli ang mga empleyado para sa ila safety.
Baliskad naman ini sa pahayag sang hepe sa diin kun ngaa nagpalauli temprano ang mga empleyado ini para maka preparar sang ila Christmas party kag wala sa ginasiling pamahog sang NPA.
Nagguwa ang balita nga si Moises Padilla Vice Mayor Ella Garcia – Yulo ang gina siling supporter sa mga katapu sang New People’s Army nga ginadeny naman sang pamilya Garcia.
Suno sa utod sang Bise-Alkalde nga Mark Garcia, humalin pa sang una dako ang bulig sang ila pamilya sa mga Cafgu nga ara sa ila lugar tubtob nga nabutangan sang isa ka battalion ang banwa nga sa ulihi gindula man sang Philippine Army.
Sa interview sang dyHB, ginpahayag ni Col. Eliezer Losañez nga negatibo kag wala sang kamatuuran nga supporter si Garcia sang NPA.
Una na nagguwa ang report nga ang Moises Padilla PNP ang isa man sa gina siling yara sa listahan nga salakayun sang NPA.
