Zamboanga del Sur – Human sa kompirmasyon nga nakasulod na dinhi sa nasud ang gika-intapan nga sakit nga 2019 Novel Coronavirus ug ang kawalay kasigurohan kun duna na bay bakuna batok niini, dili kalikayan nga mabalaka ang publiko mao nga ang uban nag-panic buying og surgical mask pangproteksyon sa kaugalingon sama sa nahitabo sa dakbayan sa Pagadian nihit na kayo ang facemask.
Gipahibalo karon sa Provincial Health Office sa Zamboanga del Sur nga dili “generally recommended” nga magsul-ob og facemask ang katawhan bisan dunay hulga sa 2019 nCoV.
Gipasabot ni Dr. Robert Capatoy, ang spokesperson sa Provincial Health Board, kadto rang mga tawong adunay gipamati sa lawas ug mga na-expose sa pasyente ang kinahanglan magbaton sa facemask kay ang maong virus makuha man pinaagi laway o luwa sa pasyente.
Sintomas sa virus ang paglisod sa pagginhawa, pag-ubo, busa daling matakbuyan niini ang nag-atiman sa pasyente hinungdan nga kinahanglan sila og proteksyon sama sa facemask.
Matud pa niya mas maayong buhaton sa mga tawo ang kalimpyo sa kanunay sa panglawas sama sa paghugas sa mga kamot matag karon ug unya ug paglimpyo sa ilang palibot aron dili basta mataptan sa mga sakit ug pagpalig-on sa immune system.
Sa ulahing kasayuran nga gipagawas sa Department of Health (DOH) anaa na sa 80 ka tawo ang gimonitor nga posibleng nagtakdan sa infection sa bag-ong coronavirus sa tibook nasud.
Sa naasoy nga datos 30 ang nagnegatibo, 2 ang kompermado nga positibo ang 67 ang gipailalom sa pagsuta.
