GIMANDO ni Regional Director Arnel M. Agabe, CESO III, DILG Regional Office X ngadto sa tanang Provincial Governors ingon man City/Municipal Mayors sulod sa hurisdiksyon sa Rehiyon 10, pinaagi sa mga DILG Provincial Directors niini ang kamanduan sa tanang Local Government Units (LGUs) nga tabangan ang Regional Line Agencies diha sa pag-monitor kung nasunod ba sa mga commercial establishments ang gitakda nga minimum public health protocols.
Pinasikad sa DILG Memorandum ni Director Agabe, pinitsahan Enero 27, 2021, gipasabot niini nga ang labing maayo nga lakang alang sa kahimsog diha sa mga publiko/pribadong mga opisina ug mga balay-patigayon (commercial establishments) samtang ang nasud nagasulod sa bag-ong normal nga panginabuhi mao ang pagtuman sa gitakda nga minimum health standards sa Department of Health (DOH), nga mao ang estrikto nga pagdistansya gikan sa ubang tao, pagsuot sa face masks ug face shields, katukoran sa sanitation stations ug ang pagkuha sa body temperature.
Nabantayan nga pipila sa mga balay-patigayon dili mapadayonon ang pag-obserbar ug pagpatuman sa minimum health standards sa DOH ug sa mga gipagula usab nga giya sa Department of Trade and Industry (DTI) ug Department of Labor and Employment (DOLE), rason nga gipagawas ang nasangpit nga memorandum sa maong katuyuan nga sundon gayud ang minimum public health protocols.
Nalatid usab sa maong memorandum ang kamanduan alang sa tanang LGUs sa paghimo sa angayang aksyon alang sa commercial establishments nga dili mohimo sa pagsunod sa minimum health protocols.
Subli usab nga gipahinumdum ni Director Agabe nga kanunay ipatuman ang BIDA ang May Disiplina: Solusyon sa COVID-19 aron mapakgang ug makunhuran ang pagkuyanap sa maong virus.
