Gikaalarma karon sa kapulisan sa Lumbia Police Station ning syudad sa Cagayan de Oro ang nitaas nga kaso sa pagpanglugos sulod sa ilang Area of Responsibility sa tuig 2018.
Matud ni PO3 Angelica Mabalot, Assistant sa Women and Child Protection Desk sa Lumbia Police Station nga niabot sa onse ka kaso ang ilang natala sa milabayng tuig nga mas taas kaysa nakalabayng duha ka tuig.
Nasayran nga sa tuig 2017, dunay napulo ka kaso sa pagpanglugos ang ilang natala ug sa 2016 unom lamang.
Gibutyag ni PO3 Mabalot nga sa 11 ka kaso sa 2018, usa lamang ka suspect karon ang napriso ug ang uban gipangita pa.
Samtang gipasabot usab ni PO3 Mabalot nga kasagara sa mga biktima mga bata ug ang mga suspect naa ra sulod sa pamilya o family related.
Tungod niini nga insedente, naalarma ang kapulisan ug duna na silay ginahimo nga paghatag impormasyon sa katawhan aron malikayan o maminusan ang kasong pagpanglugos.
