Nagapangabay ang isa ka frontliner sa Bacolod sa pareho man niya nga mga frontliners sa tunga sang COVID-19 pandemic nga mangin mahinangpanon kag mapainubuson sa mga tawo nga kun kaisa nagapasaway sa ila ginabantayan nga checkpoints.
Si Barangay Tanod Joenick Francisco sang Brgy. Sincang-Airport, Bacolod City ang isa lamang sa mga frontliners sang pungsod sa tunga sang away kontra COVID-19.
Si Francisco nga may lima ka kabataan, ang team leader sa isa sa mga check-up points sa barangay kag naga-duty ini halin alas-6:00 sang gab-i tubtob alas-6:00 sang aga.Napulo katuig na nga tanod si Franciso kag nagabaton ini sang P2,600 nga bulanan nga allowance apang bangud sang krisis sa karun, ginadungan ini sang barangay sang P400 kada bulan.
Sa ila nga duty, aminado si Francisco nga may yara sa gihapon sang mga pasaway nga residente nga nagalapas sa odd-even scheme sang home quarantine pass kag nagalapas sang curfew apang nagahingyo ini sa pareho niya nga frontliners nga kun kaisa, intsindihon kag pasensiyahan na lang ang mga ini.
Suno sa tanod, biktima man ang tanan sang krisis kag kun kaisa may yara mga nagalapas sa odd-even scheme bangud kinahanglan gid nga maguwa.
Samtang, nagapasalamat naman sa kooperasyon sang pumuluyo sa mga ginapatuman nga quarantine measures si Barangay Kagawad Edsil Talaban, nga upod man ni Francisco nga naga-duty sa check-up point.
[image: image.png]
