Roxas City, Capiz – Palaligban sa subong kon naga-eksister kag nagatrabaho gid man ang 15 ka mga persona nga napagkit sa payroll nga ginaswelduhan sang Roxas City government sa idalom sang Matahum ang Matinlo Program.
Sa ginhiwat nga pagsinapol sang Committee on Environment, ginkwestiyon ni City Councilor Powell Del Rosario nga amo man ang chairman sang nasambit nga komitiba ang pagpatuman sang Matahum ang Matinlo Program nga ginpondohan sang P500,000 sa opisina sang Sanggunian Panlungsod sa pagpanguna ni Vice Mayor Erwin Sicad.
Suno kay del Rosario, nagaduda ini kon nagatrabaho gid man agud magpaninlo sa palibot sang syudad ang 15 ka mga persona. Nagduda man ang konsehal sang nagpapirma sa iya sang payroll si SP Secretary Dino Beluso para sa sweldo sa amo nga mga persona sa una nga 15 ka adlaw sa bulan sang Agosto apisar nga wala pa natapos ang bulan. Bangud sini ginpatawag sang konsehal ang presensya sang nasambit nga mga persona sa ginhiwat nga pagsinapol sang Committee on Environment agud nga ma-usisa, apang bisan isa sa ila wala sang may nagtambong nga ginkadismaya ni del Rosario.
Ginpakita man ni del Rosario ang payroll sa kay General Services Officer Glen Amane, apang wala man ini makakilala sa 15 ka mga persona. Suno pa kay del Rosario, bisan ang iya mga kaupdanan sa Sangguniang Panglungsod wala man makakilala sa kwestyunable nga mga pangalan.
Ginpahayag dugang ni City Councilor Powell Del Rosario nga gin-usisa sini si SP Secretary Dino Beluso angut sa nasambit nga programa. Apang suno kay Beluso, si Vice Mayor kag karun acting Mayor Erwin Sicad gid lamang ang nakahibalo kun sa diin nagatrabaho ang amo nga mga persona.
Wala pa makapahayag sang sabat si Vice Mayor Erwin Sicad angut sa mga kwestunable nga pangalan sa idalum Matahum ang Matinlo Program sang iya talatapan.
