Ginapasiguro sang pamunuan sang Vallacar Transit Incorporated (VTI) nga indi tuman kataas ang saka sa pamasahe kun magbalik na sila byahe sa Lunes, Mayo 18.
Ginpahayag sa DYHB ni Jade Seballos, media relations officer sang VTI nga “slight” lamang ang saka sa pletehan kag ila pa ginahulat ang fare matrix nga ipaguwa sang Land Transportation Franchising and Regulatory Board (LTRFB) Region 6 may angut diri.
Ginakasubo ni Seballos nga magapasaka sila sang pletehan bangud apektado karun ang tanan sang sitwasyon tuga sang COVID-19 pandemic apang suno sa iya, nakita man sang LTRFB ang kakinahanglanon nga magpatuman sang fare hike bangud mapierde man ang operators ilabi pa nga tunga na lang sang carrying capacity sang bus ang dapat nga pasakyon.Apang suno kay Seballos, ginahimo man sang LTRFB nga indi tuman maapektuhan ang riding public sa fare hike nga ipatuman.
Sa Lunes pa ginalauman ni Seballos nga mapaskil sa mga bus units ang fare matrix nga mangin basehan sang mga pasahero kag sang konduktor. Samtang ginpanginwala ni Seballos ang naguwa nga mga impormasyon sa social media kahapon nga 300-500% ang saka sa pletehan sa Ceres bus kun mag-resume ang ila byahe sa Mayo 18, 2020.
[image: image.png]
<www.avast.com/sig-email?utm_medium=email&utm_source=link&utm_campaign=sig-email&utm_content=webmail>
