General Santos City—Gikalipay sa inahan sa waitress nga si Jessa Mae Malila nga Taga Barangay Calumpang ning dakbayan nga hingpit nang nadakpan ang suspek nga si Alvin Rota nga taga Antipas, North Cotabato.
Sumala ni Julieta Malila, inahan sa biktima nga wala sya masayod kung unsay bation higayon nga iyang makit-an ang suspetsado. Apan sumala pa hilabihan ang iyang kalipay nga kini nadakpan tungod hingpit na gyud nga mahatagan ug hustisya ang kamatayon sa iyang anak.
Dugang pagbutyag sa inahan ni Jessa Mae nga dako kaayong kawad-on ang kamatayon sa iyang anak ngadto sa ilang pamilya tungod usa kini sa nagatabang ngadto kanila.
Luoy usab ang gamayng anak niini nga gibyaan sa nahisgutan. Dugang pa sa ginang nga dili unta igo ang pagpriso lang sa suspek sangpit kung syay pabut-on buot niining patyon nalang ang nahisgutan tungod sa pagpatay niini sa biktima.
Nasayran nga nasikop ang suspek nga si Rota atol sa gihimong buybust operation sa Antipas Municipal Police Station niadtong nakalabayng adlaw.
kahinumduman nga una nang nakaplagan ang patayng lawas ni Jessa Mae sa usa ka lawak sa usa ka Video k Bar sa Teretorio San Miguel niadtong Enero 15 human nakig-uban sa suspek.
