General Santos City–Gihingusgan ni Mutya Escolta, igsuon sa napatay sa operasyon sa kapulisan nga si Efren Escolta nga walay armas ang iyahang igsuon ug walay kamatuoran nga misukol kini sa mga pulis nga mipusil sa nahisgutan.
Sumala pa ni Mutya nga dihang nahitabo ang gikaingong buy-bust operation, kasamtangang nagtrabaho ang iyang igsuon sa gitukod nga balay duol lang sa ilang pinuy-anan.
Sumala pa nga kalit miabot ang kapulisan dayon mideklara ug buy-bust. Gipaduko silang tanan ug didto sunod-sunod nga buto sa pusil ang ilang nadungan, didto na nila nakit-an nga nagkadugo na ang iyang igsuon kansa gikarga sa sakyanan aron dad-on sa ospital.
Dako ang pagtuo ni Mutya nga gitamnan ug ebidensya ang iyahang igsuon gumikan wala gyoy dalang droga ug armas ang nahisgutan dihang kini gi-operasyonan sa kapulisan.
Nasayran nga una nang napriso ang iyang igsuon gumikan sa pagpangulata ngadto kaniya ug niadtong Mayo 4 lang kini nakagawas sa prisohan.
Samtang giklaro usab ni Police Major Ruelito Lumiguid ang hepe sa Police Station 3, nga lihitimong operasyon ang ilang gihimo batok sa kang Efren Escolta kansa usa matud pa ka Level-1, high value target ug nalakip usab ang pangalan niini sa inter-agency drug information database.
Nasayran nga napalitan ang suspek ug usa ka sachet sa gikatahapang shabu ug nakuha usab sa iyahang posisyon ang laing 8 pa ka sachet sa shabu ug buy-bust money nga kantidad 500 pesos. Nakuha usab sa posisyon sa suspek ang .38 revolver nga dunay 4 ka buhing bala.
Dugang pa sa opisyal nga normal lang sa pamilya nga depensahan ang ilang kabanay sa salaud nga nahimo niini ug andam sila nga kini pamatud-an ugaling man magpaimbistiga ang kabanay ni Escolta bahin sa maong operasyon.(CDS)
