Pamilyang Saldua dismayado sa imbestigasyon sa DCPO sa pagka-missing sa anak

Davao City – Daw nawad-an na’g pagsalig ang pamilyang Saldua sa dagan sa imbestigasyon sa kapulisan human nga miabot na og tulo ka bulan, wala gihapoy kalambuan sa kaso sa pagka-missing ni Justine Mae Saldua niadtong Agosto 2023.

Sa interview sa DXDC RMN Davao kang Maria Lourdes Saldua, inahan ni Justine Mae nasubo siya nga wala na silay nadunggan nga feedback gikan sa Davao City Police Office (DCPO) nga maoy nanguna sa pag-imbestiga sa kaso human nga nalambigit ang amo ni Justine Mae nga si Police Major Michael Uyanguren, kanhi hepe sa Toril Police Station nga gi-relieve na sa pwesto samtang nagpadayon ang imbestigasyon.

“Kadtong mga pulis sauna nga naga-contact sa amoa sa DCPO, dili na man sila ma-contact gud. Magsige la’g ring, dili man mutubag. Kung i-text, dili man mo-reply, matud sa inahan.

Nanghinaut ang inahan ni Justine Mae nga wala nahimong bias ang imbestigasyon, ilabi na nga unang namahayag si Police Colonel Alberto Lupaz, ang director sa DCPO nga posibleng buhat-buhat lang ang maong alegasyon batok kang Uyanguren.

“Nangayo gyud ko’g tabang sa ilaha nga unta masolbad ba kanang matabangan mi sa kaso sa among anak kay tulo ka bulan wala pa gyud mi update sa among anak og unsa nay update sa ilang pag-imbestiga. Ang ilahang istorya, dili gyud daw bias ang ilang pag-imbestiga pero maskin gamay, wala man lang gyoy (development),” sulti sa inahan.

Sa pagkakaron, padayon usab ang koordinasyon sa pamilya sa opisina ni Senador Raffy Tulfo nga una nang miutingkay sa kaso.

RadyoMaN Kirby Manzon