Nagpakitabang sa RMN-DXCC ang pamilyang Tomtom sa Zone 6, Kiliog, Libona, Bukidnon human nga gipang harass sa ilang lugar.
Matud ni Jenny Tomtom, 34 anyos, dalaga, ug adunay posas ang kamot- nga niadtong Hulyo 20 ning tuiga pasado alas dose sa udto, miabot ang ilang kapitan nga si Rodulfo Sardan, uban ang barangay polis ug mga tawo nga gadala dala og sundang aron sa pagkoral sa ilang yuta.
Kini ang hinungdan nga ila kining gibabagan tungod kay ang ilang yuta gikaso pa karong panahona.
Dugang pa ni Tomtom nga niadtong adlawa, miduol ang iyang magulang sa usa ka Jerry Bautista, apan kalit lamang niini nga gaposasan ang iyang igsoon.
Kini ang hinungdan, nga iyang giduolan si Bautista aron pangutan-on kung nganong posasan niini ang iyang magulang apan sa iyang pagduol siya na hinoon ang gisumbag, gibira ang buhok ug giposasan ni Bautista.
Maayo na lang nga miduol ang usa ka barangay polis nga si Marlon Abas nga maoy mikuha kaniya.
Nasayran nga problema sa yuta ang sinugdanan sa kagubot.
