General Santos City–Aminado ang pamunuan sa General Santos City Police Office nga padayon ang pagsulod sa iligal nga droga sa syudad. Kini ang gibutyag ni Police Lt. Col. Lauro Espida, Deputy City Director for administration sa Gensan City Police Of.
Gani niining bag-uhay lang adunay gihimo nga re-shuffling sa mga hepe sa kapulisan aron mas mamahimong epektibo pa ang kampanya batok iligal nga droga ug dili matud pa sayup ang maong desisyon.
Sumala niya nga kung magpadayon ang kadasig sa kapulisan sa kampanya batok droga, sa dili madugay, mahurot na gyud kining mga drogang nagasulod sa syudad. Dugang pamahayag ni Lt. Col. Espida nga gawas sa iligal nga droga, lakip usab sa gina-tutukan sa kapulisan mao ang implementasyon sa mga executive order ingon man ang uban pang kampanya ilalom sa programang “Kabalikat” ni Police Col. Gilberto Tuzon, City Director sa GSCPO.
Saysay niini nga sa karon mas gina-pakusgan nila ang kampanya batok droga ug dili matud pa malikayan nga adunay mamatay gumikan ang mga target mosukol man sa mga otoridad inay nga sila mo-surrender. Tulo lang matud pa ang pwedeng padulngan sa mga nahilambigit sa droga, una, ang moundang, ikaduha, mo-surrender sa otoridad ug ikatulo, mamatay o madakpan panahon sa operasyon.
Kalabot niini, gibutyag ni Lt. Col. Espida nga ilaha pa karon ginasuta kung miyembro sa usa ka organisadong grupo ang mga nadakpan sa sunod-sunod nga operasyon sa kapulisan sa iligal nga droga. Sa karon matud pa, nagapadayon ang imbestigasyon sa kapulisan kung si kinsa ang source sa mga drogang nagasulod sa dakbayan ingon man ang pamaagi sa pagpamaligya niini. Nanawagan man usab ang kapulisan sa katawhan nga magpakabana pinaagi sa paghatag ug impporasyon kung si kinsa ang mga nalambigit sa illegal nga droga.(LVR)
