Ginpasiguro nanday Dr. Nanette Franco, CEO and Medical Director sang Dr. Arturo Pingoy Medical Center kag South Cotabato Provincial Health Officer Dr. Rogelio Aturdido Jr. ang safety sang mga health workers kag mga pasyenti sang balay bululngan matapos nga nangin operational na ang COVID-19 Testing Laboratory sang South Cotabato sa DAPMC.
Suno kay Dr. Franco indi basta hatagan sang license to operate ang testing laboratory sang balay bululngan kon wala nag-agi sa proseso lakip na dire ang pagpaidalom sa biosafety training sa mga staff.
Ginpahayag niya man nga tungod sa COVID-19 pandemic ginapaidalom gid nila sa maid-id nga screening ang mga pasyenti kag wala man sa laboratory testing center ginakuha ang pagkuha sang swab test.
Gindugang man ni Dr. Aturdido nga wala sang dapat nga kabalak-an kag kahadlukan ang mga pumuluyo tungod ang machine nga ginagamit sa COVID-19 testing laboratory ang safe kag patay na ang virus pag-abot sa pasilidad.
