Gihingusgan ni Bise mayor Kikang Uy ning syudad nga masulosyonan ang panagbangi kalabot sa franchise area sa Misamis Oriental Electric Service Cooperative I kon Moresco-I ug Cagayan de Oro Electric and Light Power Company kon Cepalco.
Sa milabayng sesyon sa konseho hugot nga gihangyo ang Energy Regulatory Commission sa kaulohan nga dalion na ang pagpakanaug sa hukom sa gipasakang Motion for Consideration sa Moresco-I kalabot sa ERC Case No. 2005-019 MC.
Ang maong kaso kalabot na sa panagbangi sa duha ka supplier sa sugang dagitab sa ilang franchise area dinhi sa syudad.
Gipasabot ni Konsehal Bong Lao, ang chairman sa komite sa energy ug usa sa mga nagpaluyo sa resolosyon nga tinguha sa maong lakang nga ma-facilitate ang electrification project sa pipila sa mga rural areas sa syudad.
Nasayran nga adunay mga barangay nga anaa sa bukid nga dapit nga giserbisyohan sa Moresco-I samtang ang kinatibuk-ang dapit sa syudad ang giserbisyohan sa Cepalco.
Ang resolosyon nga gisagop alang sa maong katuyuan ang gipaluyohan sa komite sa balaod ni konsehal Ian Mark Nacaya.
