Davao City – Andam mudeklara og pangayaw ang mga tribu panahon nga dili maresolba sulod sa Duterte administration ang problema sa pagpanggamit ug pagpangabuso sa mga lumad sa CPP-NPA-NDFP dinhi sa Mindanao.
Kini mao ang gibutyag ni Datu Lipatuan Joel Unad, Supreme Tribal Datu of Mindanao-wide, diin gikanayon niini nga dili mag gikan sa mga tribal leaders kundi sa komunidad mismo nga mahitabo sa kinatibuk-an sa Mindanao.
“Kung kini nga komunidad mudeklara og pangayaw sa kana nga sitwasyon, magkutay-kutay na kana sa tibuok Mindanao,” segun niini.
Gipasabot ni Unad nga kung magpadayon ang pagpangabuso ingon man pagpamatay ug uban pang mga bayolasyon ngadto sa tribu, ila kining itala bisan pa man mipirma na og executive order si Pangulong Rodrigo Duterte rason sa ilang pagdeklara og pangayaw.
Hinuon, giila sa grupo ni Unad ang lakang sa presenteng administrasyon apan nanghinaut kini nga makab-ot na ang hingpit nga kasulbaran sa maong hisgutanan.
RadyoMaN Jason Amisola
