SILAY CITY, NEGROS OCCIDENTAL – ( Update ) Ginahanda na ang kaso nga frustrated homicide nga igapasaka batuk sa suspek nag lalaki nga nag-basya sang gasolina kag nagsunog sa iya live-in partner nga babayi kag sa ila 3-anyos nga bata nga babayi sadtong Domingo sang kaagahon sa Sitio Bara, Brgy. Mambulac, Silay City.
Ang suspek nga si Cedie Gulmatico, 22 anyos, tumandok sang Brgy. Alijis, Bacolod City ang padayon karon nga detained sa custodial facility sang Silay City Police Station.
Ini matapos nga iya ginbasyahan sang gasolina kag ginsindihan ang biktima nga si Cinderella Gargaceran, 24 anyos, residente sang Brgy. Mambulac upod ang ila 3-anyos nga bata.
Suno sa hepe sang Silay City Police Office, P/Supt. Noel Polines nga ang insidente natabo may mga las 2:30 sadtong Domingo sang kaagahon sa balay sang babayi sa amo nga barangay sa Silay City.
Ginpahayag nga ang biktima kag ang iya 3-anyos nga bata nga babayi ang yara sa sulod sang ila balay sang nagpanuktok ang suspek kag hinali na lamang sila nga ginbasyahan sang gasolina kag ginsindihan gamit ang lighter.
Posibli temprano palang, ginplanuhan nya ang kremin bangod may isa ka tag-iya sang motor sa lugar nga nagreklamo nga ginbuhinan ang iya gatong suno sa isa ka saksi nga nainterview sang dyHB.
Pangimon ang ginalantaw nga rason bangod ginasiling nagaduda ang lalaki nga nagapabayad kag nagapagamit sa iban nga lalaki ang live-in ukon may iban nga lalaki.
Ginadeny naman ini sang mga ara sa palibot bangod wala man gani ini nagaguwa sa ila balay. Gusto lang sang lalaki nga papulion ang iya mag-iloy sa Alijis apang wala diri nagpasugot ang babaye bangod pirmi sila didto nagaaway.
Bangud sa hitabo, nag-angkon sang 2nd degree burns sa iya guya kag paa ang nanay subong man ang iya 3-anyos nga bata nga babayi nga nagahakos pa sa iloy sa amu nga tion.
Gilayon naman nga nadakpan sang mga utoridad ang suspek nga ginaalegar naga-gamit pa sang illegal nga druga.
Pahayag sang suspek nga naghinulsol man siya sa iya ginhimo sa iya mag-iloy nga padayon karon ginabulong sa isa ka ospital diri sa ciudad sang Bacolod./dyHB BACOLOD
