Panimalos ang motibo sa pagdunggab sa usa ka 15 anyos nga grade 9 student sa PN Roa National High School sa Calaanan, Barangay Canitoan ning syudad kagahapong adlawa.
Kini ang gipahayag ni Police Master Sergeant Senador Ostero sa Bulua Police Station, basi sa ilang imbestigasyon.
Kini human nanumbag matud pa ang biktima sa grupo nga adunay gang, nga nahitabo mismo atubangan sa guard house sulod sa maong tunghaan.
Matud sa mga estudyante nga daghang gang ang anaa sa maong tunghaan sama sa P-GOD, baby12, salbahes, SOG ug family stroke gang.
Nasayran nga gidunggab ang 15 anyos nga biktima nga taga Relocation Site sa Calaanan, Barangay Canitoan, sa 17 anyos nga lalaki nga maoy subject person.
Samtang, wala mabantayi sa gwardya sa PN Roa National High School nga si Germinigildo Caneda ang pagsulod sa 17 anyos nga midunggab sa 15 anyos nga estudyante sa PN Roa National High School.
Kini ang gibutyag ni SG Caneda, ang Deped guard sa PN Roa National High school, tungod kay atua matud pa siya sa taas nga bahin sa guard house niadtong higayona.
Dugang pa ni Caneda, nga dili na sila gagamit og detector kung alas dos na sa hapon tungod kay intact na ang mga estudyante sulod sa tunghaan.
Wala na usab nagtungha karong panahona ang 17 anyos nga subject person kinsa midunggab sa grade 9 nga estudyanteng biktima.
