iFM Laoag – Masapol a manayunan dagiti flights iti Laoag International Airport.
Daytoy ti makita a kurang ni Provincial Tourism Officer Mr. Ianree Raquel tapno ad-adu pay dagiti agsangpet a local ken foreign tourists ditoy Ilocos Norte.
Kunana a kasapulan iti tulong ken kooperasion dagiti nagduduma nga ahensia ti gobierno ken dadduma pay a grupo tapno maipatungpal daytoy. Idi imun-una, adda dagiti nagduduma nga airlines ti sumangsangbay iti probinsia isu ti gapuna nga adu dagiti bilang dagiti turista nga umay bumisita.
Kunana a nasken pay a mapabaro dagiti pasilidad ken panangpatibker ti “partnership” kadagiti stakeholders iti pribado a sector. Inlawlawag ni Raquel a kangrunaan unay iti ipaay a supporta ken kooperasion ti private sector iti panangpataud kadagiti napinpintas a tourists attractions.
Mamati ni Raquel a no kurang ken saan nga aktibo iti partisipasion dagiti pribado a sector nakapkapuy iti pigsa ti Ilocos Norte a kas maysa a tourist destinations.
Kunana a daytoy ti kangrunaan a gagem iti panagtitipon ken panagmaymaysa dagiti nagduduma nga organisasion tapno napigpigsa iti puwersa da a mangipatungpal kadagiti kalikagumda a mangpadur-as iti benneg ti turismo ditoy probinsia. (Bernard Ver, RMN News)
