CADIZ CITY, NEGROS OCCIDENTAL – (Update) Ginpasaka na ang kaso rape batuk sa isa ka pari nga gina-alleged nag molestiya sang isa ka 4 ka tuig nga bata nga babayi sa ciudad sang Cadiz.
Ang kaso ginfile sang ginikinan sang biktima sini gid lamang nga aga sa City Prosecutors Office sang Cadiz sa idalum ni Fiscal Jane Dee Maderazo.
Gin-updan sang Womens And Childrens Protection Desk ang ginikanan sang bata sa ila pagsaka sang kaso.
Kahapon naglanog ang balita angut sa ginasiling ginhimo nga pag-molestiya sang amo nga pari sa bata kon diin sa interview sang DYHB, ginpahayag sang pamilya sang bata nga halos indi sila makapati nga mahimo ini sang pari bangud suod ini sila nga magkilal-anay.
Pahayag sang himata sang bata nga masami ginahulam sang pari ang amo nga bata sa tagsa ka matapos ang misa kag ginadala sa iya hulot.
Nahibaluan nga ang iloy sang biktima ang naga-obra sa amo nga pari humalin sang nagligad nga Setyembre 2018 kag sining karon lang naghambal ang bata nga indi na siya pag-ipahulam sa pari.
Diri kag nagsugod nga magduda ang himata gani ila ginpamangkot ang bata kag iya ginsaysay ang tanan nga ginhimo sa iya sang pari.
Bangud sini, gindala sang pamilya ang biktima sa doctor kag ginpaidalum sa medical examination kag didto nag-confirm duha ka doctor nga positibo ini nga “ginhilabtan.”
Angut sini, ginpahayag sang iloy sang biktima nga ila gin-kumprontar ang pari sang nagligad nga semana kag hugot nga nagdeny ang amo nga pari.
Suno sa iloy sang bata nga nagluhod pa sa iya atubang ang pari kag nag-siling nga indi niya ini mahimo sa biktima.
Sadtong Domingo, Pebrero 24 matapos nagpatigayon sang meeting mga las 2 sang hapon, wala na dayon nakita pa ang amo nga pari tubtub subong nga tion.
Siling sang iloy sang bata sa interview sang dyHB nga tuman ka sakit para sa ila ang natabo sa ila anak nga halos “daw mabuang” ini sa pamensar sa ginhimo sang amo nga pari.
Ini ang nagtulod sa ila nga pasakaan gid sang kaso ang pari./Agnes Apostol
