General Santos City–Gikumperma ni Mayor Ronel Rivera nga gina andam na sa ilahang legal team ang ilahang buhaton nga pag file ug disqualification case sa kandidatura ni kanhing congressman Jun Acharon Jr. human nga ni file kini sa iyahang COC niadtong milabay nga adlaw aron nga magpapili isip kongresista sa 3rd district sa South Cotabato nga mao ang Gensan.
Sumala pa ni Mayor Ronel Rivera nga nakalatid na sa konstitusyon nga ang usa ka public official ang dili mamahimong makapapili sa susamang posisyon kung kini nakahuman na ug tulo ka termino.
Apan gipaklaro ni Mayor Ronnel Rivera nga dili ang kwalipikasyon isip kongresista ni kanhing Congressman Jun Acharon ang ginakwestyon tungod kay kwalipikado gyud matud pa kini, apan aduna matud pay term limit ang tanang mga opisyal sa gobyerno.
Nag tuo man usab si Mayor Rivera nga ang tawo gihapon ang maoy mupili ug kongresista sa 3rd district sa South Cotabato hinungdan nga isalig gihapon nila tanan sa katawhan.
Samtang gihingusgan man usab ni Kanhing Congressman Acharon nga lahi ang iyahang sitwasyon karon sa ginatumbok sa iyahang mga kalaban sa politika aron nga dili siya makapapili isip congresista.
Sumala pa niini nga sa karon usa matud pa siya ka private individual nga buot magpapili sa public office ug maingon lang matud pa nga mulampas siya sa term limit sa public office kung niadtong election nagpapili gilayon kini sa pagka-kongresista sa 3rd district ug paghuman sa iyahang term gilayon siyang molingkod kung modaug siya isip representante sa 3rd district apan dili matud pa kini ang nahitabo.
Daku man usab ang pagtuo ni Acharon nga paboran kini tungod kay lahi matud pa nga kaso ang iyahang gina-atubang sukwahi sa ginakumpara nga kaso ngadto kaniya sa iyahang mga kalaban ug gisalig naman usab niya kini sa iyahang mga legal officers.
Gikataw-an lang usab ni Former Congressman acharon ang hagit kaniya sa usa ka konsehal ning syudad nga makigpusta ug usa ka milyon, i-uli ang iyahang deploma ug subling mag pa tuli ug dili siya i-disqualify sa Comelec.(Dave Silagan)
