BACOLOD CITY – Gintiro patay ang isa ka Credit Investigator (CI) sang EmCor sini gid lamang nga aga sa gwa sang isa ka balaligyaan sa dalan Araneta San Sebastian, Bacolod City.
Nakilala ang biktima nga si Salvador Poja, 33 anyos ang edad, pumuluyo sang ciudad sang Bacolod, ang himata sang drug personality nga si Ramy Poja kag 9 ka bulan pa lang nga nagatrabaho bilang CI.
Suno sa initial investigation, natabo ang insidente pasado las 8 sini gid lamang nga aga sa isa ka balaligyaan sa kilid sang Lopues San Sebastian.
Pahayag sang mga nakakita, durante nagalakat ang biktima, ini siya ang gin-ipingan sang suspek nga hinali na lamang nga gintiro.
Nag-angkon sang patal nga igo sa iya ulo, li-og kag abaga ang biktima nga amo naman ang gintunaan sang iya gilayon nga kamatayon.
Ginpahayag naman sang asawa sang biktima nga si April nga pasado las 7 sini nga aga sang naghalin sa ila balay ang iya bana agud nga magsulod na sa iya trabaho.
Pila na lamang ka metros ang antad sa lugar sa diin dira sa sya gintiro sa Emcor, ang iya ginatrabahuan.
Pahayag sang asawa nga mabuot ang iya bana kag wala sang may nahibaluan nga may kontra ini.
Indi pa tul-id kon anu ang rasun kon ngaa gintiro si Poja.
