iFM Laoag – Nabakbak ti maysa kadagiti kangrunaan a paggatgatangan dagiti turista a Pasalubong Center iti amianan a paset ti Laoag City Public Market and Commercial Complex kadagiti maipasaraboda nu aggapoda iti probinsia ti Ilocos Norte.
Naminpinsan a nawaswas ti pasdek negosio a naglaon kadagiti maipasarabo a produkto ti probinsia kas kuma iti makmakan a chicharon, cornik, mani, dried mangoes ken dadduma pay bayat ti abiso nga inparuk at ti local a gobierno iti siudad ti Laoag ita laeng nga aldaw Noviembre y siete (November 7, 2019).
Segun kenni Mr. Anthony Agcaoili, Staff of the Office of the Mayor iti Department of Public Works and Highways (DPWH) iti umuna a distrito probinsial, mawaknitan amin dagiti kalkalsada iti paset ti Rizal St. ken Bonifacio St. iti siudad gapu iti pannakaimplementar ti road clearing operations.
Daytoy ket iti ordinansa a nasken laeng nga agtungpal dagiti Local Government Unit iti pagilian babaen ti direktiba ni Presidente Rodrigo Duterte iti Department of the Interior and Local Government (DILG) ken iti Department of Public Works and Highways (DPWH) iti panakipagkaykaysa ti pannakademolish kadagiti amin a waiting shed, sidewalks vendors ken dadduma pay a pribado a pasdek a makaigapo ti road obstruction.
Maipalagip a saan laeng a ditoy probinsia ti Ilocos Norte ti naapplikaran kadaytoy nga operasion agsipud ta itay napalpalabas a bulan ket insigida a nagtungpal dagiti luglugar iti uneg ti Metro Manila nu man pay nasakit ti nakem dagiti naapektaran a negosiante ken umili.
Daytoy a mandato ken operasion ket iti Memorandum Circular 121-2019 wenno iti pannakawaknit kadagiti pampublico a kalkalsada para iti umili saan ketdi a para kadagiti pribado a paspasdek ken saan a para iti road widening. (Joe Anne Agustin, RMN News)
