BAGO CITY, NEGROS OCCIDENTAL – Head-on ang bungguanay nga natabo sa isa ka mini canter kag isa ka pampasahero nga salakyan pasado las 9 sini gid lamang nga aga sa Highway Taloc 13, Bago City.
Ang mini canter ang gina-maneho ni Pastor Juanito Marquez Jr., upod ang iya asawa nga si Mila Marquez, may legal ang edad kag pumuluyo sang Brgy. Granada.
Samtang ang depasahe naman nga jeep may rota Pulupandan-Bacolod ang gina-maneho ni Rustan Talaver, 30 anyos ang edad.
Suno sa imbestigasyon ang canter ang may karga nga abono kag krudo halin sa Bacolod kag buot nga i-deliver sa banwa sang Valladolid.
Ang depasahe naman nga jeep, may karga nga 10 ka pasahero ang pakadto naman sa Bacolod halin sa Pulupandan.
Ginpahayag sang driver sang jeep nga si Talaver nga mahinay lang ang iya dalagan kon diin nagpundo ini agud nga magkuha sang pasahero apang hinali nga nag-ulpot ang canter gani nagbunggu-anay ang ila sini tagsa ka mga uluhan.
Minor injuries gid lamang ang naangkon sang 2 sa napulo ka pasahero sang jeep, samtang ang pastor naman nga nagadala sang canter ang ginbululigan pag-gwa Bago City Rescue bangud na-ungot ang tiil sini sa manibela bangud sang impact sang pagkabunggo./dyHB BACOLOD
