Emosyonal nga miatubang sa media si Pastor Charlie Prior human kini misurender sa kwerpo sa kapulisan aron atubangon ang silot sa “hit and run” nga gikamatay ni Dra. Zurielle Arambulo niadtong niaging semana.
Kinasingkasing nga nangayo ug pasaylo si Pastor Prior sa pamilya ni Dra. Arambulo sa iyang nahimung krimen tungod kay aminado siya nga bisan ug wala gituyu ang pagbangga sa biktima apan usa gihapon kini ka krimen nga iyang atubangon ang tukmang silot.
Sigun ni Pastor Prior nga dili siya buot mo-iktad sa salaod nga iyang nabuhat apan naglibog siya kung unsay angay buhaton human nahitabo ang krimen.
Naghulat lang siya ug insaktong panahon aron mosurender ug kagahapon nahitabo ang iyang pagtahan.
Kanunay siya’ng nag-ampo matud pa kauban sa iyang pamilya aron mangayo ug lamdag sa Kahitas-an sa angay niyang buhaton.
Unang gibutyag ni PSSupt. Ramir Perlito Perlas, provincial director sa Agusan del Norte Police Provincial Office (PPO) nga nakig-alayon si Pastor Prior sa iyang silingan nga pulis ug maoy naghatud kaniya sa PPO aron mosurender dala ang Montero Sport nga nakabangga.
Ang pamahayag ni PSSupt. Ramir Perlito Perlas, provincial director sa Agusan del Norte Police Provincial Office (PPO).
Sirado na ang kaso sa kamatayon ni Dra. Zurielle Arambulo human misurender si Pastor Charlie Prior sa kwerpo sa kapulisan.
Sigun ni PNP Caraga Reg’l Director PCSupt. Gilberto DC Cruz nga miresulta ang subsub nga imbistigasyon sa PNP tungod kay ikatulo si Pastor Prior nga mga “persons of interest” nga gitutukan sa kapulisan.
Unang giimbistigasyon ang usa ka seaman, ikaduha ang sakop sa pulis kinsa contractor ang asawa ug ikatulo si Pastor Prior.
Ipasaka ang kasong “reckless imprudence resulting to homicide” batok ni Pastor Prior pinaagi sa inquest proceeding ug ang City Prosecutor na ang magdesisyon kung ma-detain ba ang suspek.
Personal nga gitawagan ni PCSupt. Cruz ang pamilya ni Dra. Arambulo didto sa Cainta, Rizal aron ipahibalo kabahin sa development sa kaso.
Kabahin sa 50,000 pesos nga “reward money” nga iyang gitanyag, gibutyag ni PCSupt. Cruz nga ang mga pulis nga nagtrabaho maoy makadawat niini. [image: prior.jpg]
