BACOLOD CITY – Patay ang notoryos nga hold-up suspek matapos nagtuyo ini nga magpanghold-up sang isa ka maritime police kaina sang kaagahon sa CL Montelibano Drive, Brgy. Villamonte, diri sa ciudad sang Bacolod.
Nakilala ang napatay nga amo si Johnny Villarete alyas JR, 32 Nyos, pumuluyo sang Brgy. Bata.
Si Villarete ang isa ka notorious nga hold-up suspek sa probinsya sang Negros Occidental kag ciudad sang Bacolod kon diin may yara ini sang warrant of arrest sa Police Station 4 kag Police Station 2.
Suno sa imbestigasyon, may mga las 12:30 kaina sang kaagahon sa corner CL Montelibano- Capitol Heights 2 Road, Brgy Villamonte, Bacolod City gintuyo nga biktimahon sang grupo ni Villarete si PO2 Eric Pableo, 33 anyos, residente sang Talisay City kag assigned sa Maritime Command Banago kag ang iya upod nga babaye.
Ginpahayag ni Pampleo nga nagalakat gid sila sang iya abyan sang ini sila ang ginhold-up sang 3 ka mga suspek gamit ang replica sang M16.
Sang nakita ni Pampleo nga gin-agaw sang upod ni Villarete ang bag sang iya upod, nagpangita ini sang oportunidad nga makatiro.
Natiruhan sang pulis si Villarete gamit ang iya issued firearm nga 9mm Glock kag ini ang napatay on the spot samtang isa pa ka suspek nga nakilala kay Rustan Pecardal, 33 anyos kag pumuluyo man sang Brgy. Bata ang naigo sang makapila ka beses sa iya lawas.
Samtang ang isa pa gid sa mga suspek nga si Alyas Niño ang nakapalagyo sakay sa ila get away vehicle nga Mitsubishi Adventure color blue kag padayon ini karon nga ginalagas sang otoridad.
Ang pilason gindala naman sa Corazon Locsin Montelibano Memorial Regional Hospital para agud nga mabulong.
Si Villarete kag ang iya grupo ang nagtal-os kay Alex Barredo alyas Rondoy sang nadakpan si Rondoy kag ara karon sa BJMP nahunong. /File photo of Villarete/DYHB photo
