Maayon, Capiz – Ginbawian sang kabuhi ang 63-anyos nga amay matapos gin-alegar nga ginbuno sang makapila ka beses sang iya kaugalingon nga anak sa Barangay Tuburan, Maayon, Capiz mga 9:00 ang takna kagab-i. Nag-angkon sang madamo nga pilas sa lawas ang biktima nga si Bartolome Tumlos, residente sang nasambit nga lugar.
Ginkilala naman ang suspek sa kay Arnel Tumlos 42 anyos, anak sang biktima nga ginapahayag may deperensya sa paminsaron. Ginpahayag ni PO2 Vincent Dumagpi, imbestigador sang Maayon PNP, nga nagluntad ang insidente matapos nagpauli ang biktima sa ila poluy-an nagikan Barangay Hinpona, Pontevedra agud kamustahon ang kahimtangan sang anak. Suno sa pila ka mga residente nga nabatian pa nila ang pagbinaisay sang mag-amay antes ang krimen.
Apang aga na sang nasapwan ni Enriquita Tumlos iloy sang suspek sang magpauli man ini ang bangkay sang iya bana. Nagsungka man sa mga nagresponde nga kapulisan ang nasambit nga suspek kag magapangatubang sang kaso nga parricide ang nasambit nga suspek.
