LA CASTELLANA – Duha ang patay kag isa ang samaron matapos nagresponde ang mga kapulisan sang ginhold up ang driver-collector sang D’ Jade Marketing sa Public Market sang Brgy. Cabacungan las dos kaina sang hapon.
Ang mga suspetsado nga nagkalamatay amo sanday Edgar Recana, 27 anyos sang General Santos City, South Cotabato kag Jay-R Sta. Ana, 30 anyos sang Prk Dos, Magallon Cadre, banwa sang Moises Padilla.
Ang samaron nga may igo sang bala sa iya paa kag botkon nga ginabulong sa Regional Hospital amo si Garnel Solibada, 26 anyos sang Davao Oriental.
Sa interview sang dyHB kay P/Supt. Erma Tiocson, hepe sang La Castellana PNP, pasado alas dos kaina sang hapon samtang nagadeliver sang feeds si Raul Loyola, 45 anyos nga nagaserbe man driver-collector sang D’ Jade Marketing, gulpi lamang ini nga gintayaan sang cal. 45 pistola sang isa sa mga suspetsado kag nagdeklara sang hold-ap.
Nakuha sa iya ang kapin P190 mil pesos nga koleksyon sa diin gilayon niya ini nga ginreport sa mga kapulisan.
Sa pagresponde sang mga kapulisan naabtan nila ang mga suspetsado nga masakay sa ila motorsiklo gani nagkuntad ang pagbaylohanay sang lupok nga nagresulta sang ila kamatayon.
Narecover sang mga kapulisan ang isa ka cal. 45 nga pistola kag isa ka 357 revolver.
Nabawi man ang kuarta nga P190 mil pesos gikan sa mga suspek.
Ang bangkay sang duha ka mga suspetsado ang ara nahaya sa Nalagon Funeral Homes sa banwa sang La Castellana. / Ang suspek nga si Garnel Solibada sang Davao Oriental/ Albert Giner photo/ RMN
