Jolo, Sulu – Niabot na sa 45 katawo ang nakabsan sa kinabuhi human nihagsa ang C-130 plane sa Philippine Air Force (PAF) sa Patikul, Sulu.
Base sa ulahing report sa Armed Forces of the Philippines alas 8:40 kagabii, moihap sa 42 ang namatay nga mga military personnel nga sakay sa eroplano ug tulo ka sibilyan ang nadamay sa insidente.
Samaran usab ang 49 ka mga sundalo ug aduna pay lima ka sundalo nga ilang gipangita sa gihimo nga retrieval operations.
Upat usab ka sibilyan ang anaa pa karon sa ospital nga samaran usab sa maong hitabo samtang naigo sa mga bahin sa eroplano.
Nasayran nga gikan sa Lumbia Airport sa Cagayan de Oro City ang C130 military aircraft ug motugpa na unta sa Jolo port sa Sulu apan nahagsa kini mga 11:30 kagahapon sa buntag.
Sumala ni AFP Chief General Cirilito Sobejana nilapas og wala makita matud pa ang runway maong nahagsa ang eroplano.
Gisulayan pa unta nga mobawi paglupad apan nahagsa kini sa Barangay Bangal, Patikul Sulu.
Pulos mga bag-ong Philippine Army privates ang sakay sa maong eroplano nga gilangkuban sa 96 ka sundalo, tulo ka piloto ug lima ka crew members.
Dunay pipila nga sakay sa eroplano ang nangambak ayha kini nahagsa.
Nanawagan ang AFP nga undangan na ang pagpakatag sa sayop nga impormasyon labot sa maong aksidente sa kahanginan.
