Wala pa gihapon maila ang usa ka patayng lawas nga nakit-ang naglutaw-lutaw kagahapon sa buntag sa suba, duol sa Isla de Oro ning syudad nga anaa na sa pagkadugta.
Matud ni Police Chief Insp. Julius Clark Macariola, Hepe sa Divisoria Police Station nga nakit-an sa usa ka residente nga naglutaw sa suba ang maong patayng lawas kung asa miburot na pagmaayo ang lawas niini hinungdang gidala kini sa kilid nga bahin sa suba.
Dugang pa ni Chief Insp. Macariola nga nagsuot ang biktima sa kolor puti nga cycling, walay sinina nga pangtaas, nakatsinelas ug gibana-banang nagsukod sa 5’2 nga gitas-on.
Matud pa sa maong opisyal, nga dili pa nila masulti kung gibinuangan ba ang biktima nga adunay mga garas sa lawas samtang nagtuo usab ang uban nga nalumos kini human maligo sa suba.
Gituhoan usab nga pila ka adlaw na kining naglutaw kay gakadugta na kini.
