Davao City – Alas 8 sa buntag adlawng Martes ulahing nakita ni Necel Mejares, 29 anyos ang iyang live-in partner nga taxi drayber kinsa gidunggab patay sa ZRU Village, Brgy. Mandug, Buhangin District ning dakbayan sa Davao.
Saysay sa asawa sa biktima nga usa ka buotang bana ug amahan sa ilang duha kabuok ka mga anak si Erlindo Moreno, 41 anyos kinsa iyang kapuyo sa siyam na katuig.
Nidangoyngoy kini sa paghilak ug dili niini madawat ang pagkutlo sa kinabuhi sa iyang bana.
Matud niini wala gayod kiniy mga nakabangi ang biktima.
Duha ka tuig nga drayber sa taxi si Moreno.
Nailo ni Moreno ang otso anyos ug dyes anyos nga mga anak nga babae.
Gihaya na ang biktima sa ilang panimalay sa Sunctuary, Prk. 7, Brgy. 8-A, Father Selga.
Samtang gibutyag ni Buhangin PNP Station Commander PCI Jack Tilcag pipila sa ilang gilantaw nga motibo sa pagdunggab-patay sa biktima mao ang personal nga bangi ug tulis.
Sumala ni Tilcag duha ka tao ang ilang gikonsidera karong persons of interests.
Sa gihimong imbestigasyon sa mga awtoridad walay nawala nga mga kagamitan sa biktima.
Segun ni Tilcag ilang gipaningkamutan karon nga makolekta ang mga cctv footages duol sa maong lugar aron makatabang kanila nga matudlo ang mga nihimo sa krimen.
Narekober sa crime scene ang usa ka kitchen knife nga maoy gigamit sa pagdunggab patay sa drayber.
RadyoMaN Aimee Guinita
