Dipolog City – Natuwad ang usa ka balay nga nahimutang sa may Lower Barangay Dicayas, dakbayan sa Dipolog human madasmagan sa nahaybol nga payloader mga alas 11:20 kagahapon sa buntag.
Ang balay nga gama lang sa light materials gipanag-iya sa usa ka Helen Jebone Montilla, 51 anyos, wa maminyo, kinsa akto nga wala diha atol sa aksidente.
Sa imbistigasyon ni PO1 Greggy Neil Enon ang traffic investigator sa PNP Dipolog, nasuta ang payloader nga kolor yellow gipanag-iya kini ni Nilo Lopina ug gimanehoan sa usa ka Nico Mangumpit Peroy, 25 anyos, ulitawo nga taga lungsod sa Baliangao, Misamis Occidental, kuyog niya ang iyang helper nga si Jay Samson Villanueva, 25 anyos, taga lungsod sa katipunan.
Nagbiyahe gikan sa Barangay Turno, paingon na adtong tungura sa Barangay Dicayas apan pagabot sa lugsongon nga bahin sa karsada, sumala pa sa driver niini nag- malfunction ang makina og kalit nga napalong hinongdan hinay-hinay nidaus-os sa road barrier apan wa ka pogong nilahos sa balay ni Montilla nga maayong pagkatuwad niini sa may sapa.
Hinuon wala ray nainjury atol sa aksidente, gawas lang sa pagkadamage sa road barrier ug sa balay.
Sumala pa ni PO1 Enon nga nagka-uyon ang tag-iya sa balay ug sa ekipo nga abagahon niini ang gasto sa pagpabarog pagbalik sa natuwad nga balay.
