Nagapati ang punong barangay sang Alangilan sa ciudad sang Bacolod nga maguwa gid ang kamatuoran matapos ginpasakaan ini sang kaso kag 20 ka iban pa may angut sa gina-alegar anomaliya sa distribisyon sang Social Amelioration Program.
Hunyo 16 sang ginpasaka sang Criminal Investigation and Detection Group (CIDG) – Bacolod, ang kaso nga paglapas sa Republic Act (RA) 3019 ukon Anti-Graft and Corrupt Practices Act, RA 11469 ukon Bayanihan to Heal as One Act kag RA 6713 ukon Code of Conduct and Ethical Standards for Public Officials and Employees sa City Prosecutor’s Office batok kay Punong Barangay Degie Tanista Sr., Kagawad Michael Solano, barangay secretary, lima ka barangay staff kag 13 ka surveyor.
Sa interview sang DYHB kay Tanista, ginpahayag sini nga kuntani wala na lang gindalahig sa kaso ang 18 ka iban pa nga nag-volunteer lang sa pag-survey sang ila pumuluyo, lakip na ang tatlo niya kabataan nga nag-drive lang sang motorsiklo para sa mga surveyors.
Madumduman nga nag-ugat ang kaso sa reklamo nga may pila ka indi man pigado apang nakabaton sang ayuda kag may mga himata pa si Tanista nga nakabaton sang SAP.
Aminado naman ang punong barangay nga may mga himata siya nga nakabaton sang SAP apang qualified man sila nga magbaton bangud pigado man ang mga ini.
Handa naman si Tanista nga atubangon ang kaso kag nagalaom siya nga maguwa ang kamatuoran nga wala sang iregularidad sa distribusyon nila sang SAP sa Alangilan.
[image: image.png]
<www.avast.com/sig-email?utm_medium=email&utm_source=link&utm_campaign=sig-email&utm_content=webmail>
